హైదరాబాద్, వెలుగు:పాలిటెక్నిక్ కాలేజీల్లోని డిప్లొమా కోర్సుల్లో అడ్మిషన్ల కోసం గత నెలలో నిర్వహించిన పాలిసెట్–2024 ఫలితాలను సోమవారం రిలీజ్ చేయనున్నట్టు అధికారులు ప్రకటించారు. ఈ సమయంలోనే ఐటీఏ ద్వారా పాలిటెక్నిక్ కాలేజీల్లో లేటరల్ ఎంట్రీ ద్వారా సెకండియర్లో చేరేందుకు నిర్వహించిన ఎల్పీ సెట్ ఫలితాలు కూడా విడుదల చేయనున్నారు.
మాసబ్ ట్యాంక్లోని టెక్నికల్ ఎడ్యుకేషన్ బోర్డు ఆఫీసులో మధ్యాహ్నం 12 గంటలకు విద్యాశాఖ కార్యదర్శి బుర్రా వెంకటేశం ఫలితాలను రిలీజ్ చేయనున్నారు. మే 24న జరిగిన పరీక్షకు 82,809 మంది స్టూడెంట్లు అటెండ్ అయ్యారు.
ఈ పరీక్షలో క్వాలిఫై అయిన స్టూడెంట్లు మూడేండ్ల ఇంజినీరింగ్, నాన్ ఇంజినీరింగ్ డిప్లొమా కోర్సులతో పాటు అగ్రికల్చర్, హార్టికల్చర్, వెటర్నరీ డిప్లొమా కోర్సుల్లో అడ్మిషన్లు పొందనున్నారు. కాగా, ఈ నెల 20 నుంచి పాలిసెట్ అడ్మిషన్ కౌన్సెలింగ్ ప్రారంభం కానుండగా, దానికి సంబంధించిన షెడ్యూల్ కూడా రిలీజ్ చేశారు.
